Украина президенти Володимир Зеленский мамлакат НАТО саммитида иштирок этишга таклиф этилганини маълум қилди. Унга кўра, саммит 24–25 июн кунлари Нидерландиянинг Ҳаага шаҳрида бўлиб ўтади. Зеленский Ташқи ишлар вазири Андрий Сибига саммит натижалари ва унинг формати юзасидан НАТОдаги ҳамкасблари билан музокаралар ўтказишини билдирган.
2 июн куни Истанбулда Россия ва Украина вакиллари ўртасида музокаралар бўлиб ўтди. Томонлар можарони бартараф этиш бўйича меморандум лойиҳалари билан алмашди. Украина ҳужжатида мамлакатнинг бетараф мақомда қолиш мажбурияти йўқлиги ва Европа Иттифоқи ҳамда НАТОга қўшилишга интилиш қонуний экани таъкидланган.
Россия эса, аксинча, Украина ҳарбий иттифоқларга, жумладан НАТОга қўшилишдан воз кечиши кераклигини билдирган. РФ ташқи ишлар вазири Сергей Лавров НАТО аввал нейтрал бўлган Финляндия ва Швецияни ҳам аъзо қилганини, шунингдек, Россия чегараси яқинида доимий равишда ҳарбий машқлар ўтказилаётганини танқид остига олди.
Москва Ғарб давлатларининг Арктика минтақасини милитаризация қилишга уринаётганини ҳам қайд этган. АҚШ президентининг махсус вакили Кит Келлог эса Россиянинг НАТО кенгайиши борасидаги хавотирини асосли деб атади. Унинг таъкидлашича, Украина НАТОга қўшилиши ҳозирча муҳокама қилинмаётган масала ҳисобланади ва бу позицияни альянснинг яна бир неча аъзоси қўллаб-қувватламоқда.