Хитой АҚШни Осиё-Тинч океани минтақасида кескинликни кучайтириш ва тинчликка таҳдид солишда айблади. Бу ҳақда Хитой Ташқи ишлар вазирлиги 3 июнь куни расмий сайтида эълон қилган баёнотда маълум қилинди.
Баёнот АҚШ мудофаа вазири Пит Хегсетнинг Сингапурдаги Шангри-Ла хавфсизлик форумидаги нутқига жавоб сифатида берилди. Хитой томонига кўра, Вашингтон ҳудудда ўз геосиёсий устунлигини сақлаб қолиш учун «Ҳинд-Тинч океани» стратегиясини амалга оширмоқда ва Жанубий Хитой денгизи атрофида ҳужумкор қуроллар жойлаштирмоқда.
Хитой дипломатлари АҚШнинг бу ҳаракатларини ҳудуд мамлакатлари ўртасида ишончсизлик ва тартибсизликни кучайтирувчи омил сифатида баҳолаган. Минтақадаги мамлакатларда АҚШнинг ҳарбий фаолияти жиддий хавотир уйғотмоқда.
Шунингдек, Хитой Қўшма Штатларни «Хитой таҳдиди назарияси»ни бўрттириб кўрсатиш ва қарама-қаршиликни сунъий равишда кучайтиришда танқид қилди. Баёнотда Вашингтон минтақада осойишталикни бузмаслик, ҳурмат ва ҳамкорликка асосланган ёндашувни қабул қилишга чақирилган.
Хитой АҚШдан тинчликка таҳдид солувчи сиёсатлардан воз кечишни, ҳамкорликни мустаҳкамлаш ва минтақада барқарорликни таъминлашга қаратилган ҳаракатларни амалга оширишни талаб қилмоқда.