Индонезиядаги Lion Air авиаҳалокатида жабр кўрган 16 оила манфаатларини ҳимоя қилувчи адвокат Санджив Сингх BBC нашрига берган интервьюсида келишувни «ахлоқан жирканч» деб атади. Унинг таъкидлашича, мазкур келишув Boeing’га «жиноий жавобгарликдан ҳақиқий қочиш» имконини беради.
Келишувга мувофиқ, Boeing 346 қурбоннинг яқинларига умумий $444,5 млн тўлайди, қўшимча равишда хавфсизлик, сифат ва назорат тизимларини яхшилаш учун $455 млн ажратади. Шунингдек, компания $487,2 млнлик жиноий жаримага рози бўлган, унинг ярми 2021 йилдаёқ тўланган эди.
Агар федерал судя ушбу келишувни маъқулласа, Boeing жиноий суд жараёнидан қутулиб қолади. АҚШ Қимматли қоғозлар ва биржалар комиссиясига берилган маълумотга кўра, АҚШ Адлия вазирлиги компанияга қарши қўшимча жиноий иш очмасликка рози бўлган.
Boeing ўз баёнотида ҳалок бўлганлар хотирасини улуғлаш мақсадида компанияда кенг қамровли ислоҳотлар ўтказишда давом этишини билдирган.
Шу билан бирга, Сингх келишув федерал судя томонидан кўриб чиқилаётганда жабрланувчиларнинг қаршилиги билдирилиши мумкинлигини айтди. Унинг фикрича, белгиланган маблағлар компаниянинг ҳақиқий жавобгарлигини қопламайди.
«Бу $1,1 млрд ҳақиқатда Boeing учун жиноий жавобгарликдан 10 доллар тўлаб қутулиш каби. Бу оддий автотураргоҳ жаримаси каби кўринади», деди адвокат.