Kpler таҳлилий платформаси маълумотларига кўра, 2024 йилда Франция, Белгия, Испания ва Нидерландия ЕИга келган Россия СТГсининг 97 фоизини импорт қилган. Умумий ҳажм 16,77 млн тоннани, умумий қиймат эса 6 млрд еврога яқинни ташкил этди.
Париж Россиядан СТГ импорт қилувчи ЕИдаги энг йирик харидорга айланди. Франция энергетика вазири Марк Ферруччи «Politico» нашрига берган изоҳида мамлакат Қатардан келадиган газ ҳисобидан Россия ҳажмини тўлдириш бўйича иш олиб бораётганини айтди.
Белгия эса тақиқнинг инфратузилмага таъсирини ўрганишни талаб қилмоқда. Энергетика вазири Матие Бие Еврокомиссиядан мукаммал таҳлил тақдим этишни сўради.
Бошқа томондан, Испания ва Нидерландия Россия газидан бутунлай воз кечишга тайёр эканини билдиришди. Гарчи Испания 2042 йилгача «Новатэк» билан, Нидерландия эса 2032 йилгача TotalEnergies орқали шартномага эга бўлса-да, улар шартномаларни бекор қилишга тайёр эканини маълум қилган.
Франция расман Россия энергия манбаларидан воз кечиш йўлида ЕИ позициясини қўллаб-қувватлаётган бўлса-да, амалдаги шартномаларни бекор қилиш ҳуқуқий муаммоларга сабаб бўлиши мумкинлигини уқтирди. Айниқса, TotalEnergies компанияси «Ямал СТГ» лойиҳасида 20 фоиз улушга эга ва 2032 йилгача амалда бўлган шартномаси мавжуд.