Европа Комиссияси 6 июн куни тақдим этган янги «Халқаро рақамли стратегия»да Евроиттифоқнинг АҚШ технологияларига қарамлиги қисқа муддатда бартараф этилиши мумкин эмаслиги очиқ тан олинди. Стратегия лойиҳасида «технологик ажралиш амалда реал эмас» дея қайд этилган.
Охирги йилларда Европа АҚШга қарам бўлган ҳолда сунъий интеллект, булутли хизматлар ва микрочиплар соҳасида жиддий ортда қолаётгани қайд этилди. АҚШ компаниялари Европа булутли хизматлари бозорининг 70 фоиздан ортиғини эгаллаб турибди, Европа чиплар бозоридаги улуши эса 10 фоизга тушган.
Шу сабабли, Европа технологик мустақиллик эмас, балки кенг кўламли ҳамкорлик стратегиясини қабул қилмоқда. Бу ҳамкорлик нафақат АҚШ, балки Япония, Хитой, Ҳиндистон ва Жанубий Корея каби мамлакатларни ҳам қамраб олади.
Европа парламентида қабул қилинган янги йўналишлар орасида сунъий интеллект, квант технологиялар, хавфсиз алоқа ва чиплар соҳасида халқаро шериклик имкониятлари белгиланган.
Европанинг технологик мустақиллик ҳаракатларини қўллаб-қувватловчилар, жумладан Cristina Caffarra ва Axel Voss ёрдамчиси Kai Zenner, «Eurostack» ташаббусини илгари сурган. Бироқ айрим сиёсатчилар бу ҳаракат реал асосга эга эмаслигини таъкидлашмоқда.
Консерватив болгар депутати Ева Майделнинг таъкидлашича, Европа реал ҳолатни тан олиши ва ўз имкониятларини аниқ баҳолаши керак: «Айрим поездлар аллақачон кетиб бўлган».
ЕИнинг янги рақамли етакчиси Ҳенна Вирккунэн Еврокомиссиянинг очиқ сиёсатини таъкидлаб, АҚШ, Япония ва Ҳиндистонга ташрифлар уюштирган. Унинг сўзларига кўра, стратегик соҳаларда АҚШ билан ҳамкорликни мустаҳкамлаш зарур.
Бундан ташқари, Даниянинг Копенгаген ва Орхус шаҳарлари Microsoft хизматларидан воз кечишга қаратиладиган лойиҳаларни бошлади. Аммо Брюссел бу ташаббуслар ортида реал технологик альтернатива йўқлигини тан олмоқда.