Берлинда бўлиб ўтган бизнес анжуманида сўзга чиққан Мерц, Капитолий тепалигида бир қатор сенаторлар билан учрашувда Россия иқтисодиётининг ҳарбий релсларга ўтгани, унинг Шимолий Корея ва Эрон билан қурол битимлари имзолагани ҳақида маълумот берганини айтди. «Улар воқеликни англамаяпти, бу жуда хавфли ҳолат», — деди у, сенаторлар номларини очиқламаган ҳолда.
Мерц сўзларига кўра, Россия 2022 йилдаги Украинага бостириб киришдан бери ўз иқтисодиётини тўлиқ ҳарбийлаштирди ва НАТО ҳудудига зарба бериш қобилиятига эга бўлиши мумкин. Европалик расмийлар бундай эҳтимолни жиддий хавотир билан қабул қилмоқда.
Май ойида ҳокимиятга келган Германия канцлери АҚШ президенти Доналд Трамп билан учрашувдан сўнг, Вашингтон НАТОдан чиқиш ниятида эмаслигини эшитганидан умидвор бўлганини таъкидлади. Мерц, шунингдек, НАТО аъзоларининг ҳарбий харажатларни ЯИМнинг 5 фоизигача ошириш тўғрисидаги Трамп талаби билан рози эканини маълум қилди.
Трамп ҳам Мерцнинг ушбу позициясини қўллаб-қувватлаб, АҚШ қўшинлари Германияда қолишини маълум қилган. Мерц эса Европа учун ҳали узоқ йиллар давомида АҚШга боғлиқлик сақланиб қолишини эътироф этди.