NBC телеканали хабар беришича, Илон Маск республикачилар партияси етакчилари томонидан қўллаб-қувватланаётган Трампнинг «катта ва чиройли» солиқ қонун лойиҳасини «жирканч» деб атаган. Миллиардер агар бу лойиҳа қабул қилинса, у республикачиларни сиёсий саҳнадан четлатиш учун «миллионлаб доллар» сарфлашини айтган.
Маскнинг маслаҳатчиларидан бири унинг сиёсий ёндашуви ўзгарганини ва энди Трамп кампаниясини молиялаштиришга эҳтиёж сезмаётганини маълум қилди. Эслатиб ўтамиз, Маск 2024 йилда Трампнинг сайловолди кампаниясига 275 млн доллар ажратган эди.
Мазкур зиддият республикачиларни мураккаб вазиятга солмоқда. Улар Маск каби йирик донорни йўқотишдан қўрқишади, шу билан бирга Трамп ишончини йўқотиш ҳам сиёсий фаолиятларига таҳдид солади. Айримлар, хусусан, конгрессмен Дон Бейкон бу можарога аралашмасликни маъқул кўрмоқда. Бошқалар эса Трампни Маскка қарши ҳужумга чақирмоқда.
Оқ уйнинг собиқ маслаҳатчиси Стив Бэннон Маскнинг фаолиятини текшириш, жумладан унинг фуқаролиги ва Хитой билан алоқалари бўйича тергов ўтказишни талаб қилмоқда. Шу билан бирга, Маск ҳам Трампни жиддий айбловлар билан таҳдид қилмоқда — у президентни педофил Жеффри Эпштейн билан боғлиқ жиноят ишига алоқадорликда гумон қилмоқда.
Маскнинг ҳужумларига жавобан Трамп Tesla ва бошқа компанияларга берилаётган барча федерал субсидияларни тўхтатишини айтди. Бу хабар ортидан Tesla акциялари 14 фоизга пасайди.
Айрим демократлар ушбу зиддиятдан мамнун — уларнинг фикрича, бу можаро солиқ қонун лойиҳасининг қабул қилинишига тўсқинлик қилиши ва Трампнинг нуфузига зарба бериши мумкин. Бироқ Трампнинг яқин атрофидагилар буни вақтинча тушунмовчилик, деб ҳисоблашмоқда.
«Орадан бир ой ўтади, улар яна Овал кабинетда суҳбатлашиб ўтиради», — деди Трампнинг яқин сафдошларидан бири NBC’га.
Ҳозир эса асосий савол шу: Маск чиндан ҳам демократлар сафига ўтадими ёки бу жамоатчилик эътиборини жалб қилиш учун ўйланган навбатдаги пиар-кампаниями?