Италия нашри La Verità томонидан уюштирилган тадбирда чиқиш қилган Жоржа Мелони Исроилнинг Ғазода амалга ошираётган ҳарбий ҳаракатлари «қабул қилиб бўлмас даражага етганини» айтди. Унинг таъкидлашича, фуқароларнинг ҳаёти ва хавфсизлигини таъминлаш учун ҳарбий операциялар тезда тўхтатилиши керак.
Мелони Италиянинг Ғазо сектори аҳолиси учун энг йирик ҳуманитар ёрдам кўрсатувчи мамлакатлардан бири эканини эслатиб ўтди. Унинг сўзларига кўра, Италия инсонпарварлик кўмаги орқали тинч аҳолига ёрдам беришни давом эттиради.
Бош вазир Яқин Шарқдаги вазият юзасидан гапирар экан, араб мамлакатлари ва Форс кўрфази давлатларининг келгусида Ғазо тартиботи бўйича ташаббусларини муҳим деб атади. Ушбу давлатлар тинчлик жараёнида ҳал қилувчи рол ўйнаши мумкинлигини таъкидлади.
Украинадаги уруш ҳақида фикр билдирган Мелони, Россиянинг хатти-ҳаракатларини хавотирли деб баҳолади. Унинг таъкидлашича, халқаро ҳамжамиятнинг тинчликка чақирувларига қарамай, Москва фақат фуқаролик инфратузилмасига зарбалар бериш ва ички аудиторияга қаратилган шовинистик риторика билан жавоб бермоқда.
Мелони шунингдек, АҚШ президенти Доналд Трампнинг сўзларига ҳам муносабат билдирди. Трамп Украина НАТОга аъзо бўлмаслиги кераклиги ва Россия халқаро ҳамжамиятга қайтарилиши лозимлигини айтган эди. Италия бош вазирининг таъкидлашича, Ғарбдан бундай «мулойим» сигналлар кетар экан, Москвадан аслида конструктив қадамлар кутилиши керак, аммо амалда бунга тескари ҳолат юз бермоқда.