Ямалнинг трансфер қиймати 180 млн евродан 200 млн еврогача оширилди. Бу билан у аввалги етакчи — «Реал»нинг бразилиялик юлдузи Винисиус Жуниорни ортда қолдирди. Винисиуснинг қиймати эса 30 млн еврога камайиб, 170 млн еврога тушди.
Transfermarkt рейтингининг иккинчи ўрнида уч нафар футболчи жой олган: «Реал» форварди Килиан Мбаппе, унинг жамоадоши Жуд Беллингҳэм ва «Манчестер Сити» ҳужумчиси Эрлинг Ҳоланд — ҳар бири 180 млн еврога баҳоланган.
Ямал май ойида «Барселона» билан 2031 йилгача шартнома узайтирган эди. 3 июн куни у Халқаро спорт тадқиқотлари маркази (CIES Football Observatory) томонидан ҳам дунёдаги энг қиммат футболчи, деб тан олинди. Унинг иқтисодий алгоритм асосида баҳоланган трансфер қиймати 402,3 млн еврога етди.
Ямал Евро-2024нинг энг яхши ёш футболчиси ва чемпион унвонини қўлга киритган. Шунингдек, у Европадаги энг яхши ёш футболчига бериладиган Golden Boy мукофотини ҳам ютган. Жорий мавсумда эса у «Барселона» билан бирга Испания чемпионлиги ва Кубогини қўлга киритган.