Бу ҳақда у Франциянинг LCI телеканалига берган интервюсида таъкидлаб ўтди.
«Менимча, руслар фақат куч тилини тушунадилар… Европа узоқ муддатда мустаҳкамланиши шарт, Россия билан стратегик келишув зарур», — деди Орбан.
Унинг сўзларига кўра, Россияда Украинага таслим бўлишни мажбурлаш учун етарли куч йўқ, демак, можаро янада кенгайиши эҳтимоли паст.
«Руслар бунга жуда ожиз. Улар ҳатто Украинани мағлуб эта олмаяптилар, шундай экан, НАТОга ҳужум қилиш ҳам улар қўлидан келмайди», — деб таъкидлади у.
Шу билан бирга, Орбан яна Киевни НАТО ёки Европа Иттифоқига аъзо бўлишга арзимайди, деб ҳисоблашини билдирди. У бу нуқтайи назарини Украинага аъзолик ҳолатида Венгрия ва ЕИ Россия билан тўғридан тўғри уруш хавфи остида қолиши билан изоҳлади.
«Биз украин тарихини французларга нисбатан яхшироқ тушунамиз… Биз русларни севмаслигимиз мумкин, лекин улар билан келишишимиз керак», — деди Орбан.
У аввал ҳам Украина урушдан сўнг Россия ва НАТО ўртасидаги «буфер ҳудуд»га айланишини айтган эди. Шунингдек, Орбан Европа етакчиларини Владимир Путин билан музокараларни қайта тиклашга чақирган, чунки, унинг фикрича, Украинадаги урушни тинч йўл билан ҳал қилиш бусиз имконсиз.
Орбан ва Словакия бош вазири Роберт Фицо Европада Владимир Путиннинг асосий сиёсий тарафдорлари сифатида танилади. Улар Россияга қарши санкциялар бекор қилиниши ва Украинага ёрдам ташаббуслари тўхтатилиши тарафдори бўлиб келмоқда.
Politico нашри апрел ойида хабар қилганидек, бир қатор ЕИ давлатлари бу каби қаршиликларни бартараф этиш мақсадида Москвага нисбатан чекловларни миллий даражада муҳокама қилиш имкониятини кўриб чиқмоқда. Агар етакчи давлатлар бу таклифни амалга оширса, Венгрия ЕИ қарорларини блоклаш имкониятини йўқотиши мумкин.