2025 йил 7 июн куни Доналд Трамп АҚШ Иммиграция ва божхона полицияси (ICE) томонидан Лос-Анжелесда ўтказилган рейдлар ортидан бошланган намойишларни тинчлантириш учун Миллий гвардияни жойлаштириш буйруғини берди. Намойишчилар ва федерал агентлар ўртасида тўқнашувлар кузатилди, намойишчилар полиция машиналарига тош ва тухум отишди. Ҳукумат кучлари резина ўқ ва светошумли гранаталар ишлатди, камида 44 киши қўлга олинди.
8 июн куни норозилик акциялари Лос-Анжелес атрофидаги шаҳарларга ҳам тарқалди. Хусусан, асосан латиноамерикаликлар яшайдиган Парамаунтда ҳам митинглар ўтди. Трамп ўз фармонида бу каби намойишлар федерал қонунларни бажаришга тўсиқ бўлаётганини ва «ҳукуматга қарши исён шакли» эканини таъкидлади.
Фармонга кўра, Миллий гвардия аскарлари ICE ва бошқа федерал идора ходимларини ҳимоя қилиш учун 60 кунга жойлаштирилади. Бу жараёнга бош қарорни АҚШ мудофаа вазири қабул қилади.
Калифорния губернатори Гэвин Ньюсом бу қарорни қаттиқ танқид қилди. Унинг таъкидлашича, Трамп полиция етишмаслиги сабаб эмас, балки «томоша уюштириш» учун гвардияни юборган. Ньюсом аҳолини тинч норозилик билдиришга чақирди ва зўравонликдан тийилишни сўради.
Губернатор 8 июнь куни АҚШ мудофаа вазири Пит Хегсетга расмий хат йўллаб, Миллий гвардияни чақириб олишни талаб қилди. У Трампнинг аралашувини «суверенитетга тажовуз» ва «тинчликни бузиш» сифатида баҳолади.