Украина президенти Володимир Зеленскийнинг маълум қилишича, мамлакат «Шаҳид» туридаги дронларга қарши курашиш учун 20 мингта ракета олиши керак эди. Унинг сўзларига кўра, бу ракета етказиб бериш қарори АҚШ президенти Жо Байден бошчилигида қабул қилинган, аммо кейинчалик улар Яқин Шарққа йўналтирилган.
Зеленский бу ракеталар катта қийматга эга бўлмаса-да, муҳим технология билан жиҳозланганини таъкидлаган. Унинг айтишича, Украина айнан шу ракеталарга таянишни режалаштирганди. Аммо сўнгги маълумотларга кўра, Америка ушбу ракеталарни Украинага эмас, балки Яқин Шарқдаги манзилга жўнатган.
У, шунингдек, ушбу лойиҳа Байден президентлиги даврида, АҚШ мудофаа вазири Ллойд Остин иштирокида шаклланганини эслатиб ўтди.
«Шаҳид» дронлари 2022 йил кузидан бошлаб Украина учун жиддий таҳдидга айланди. Бу дронлар катта масофага учиш қобилиятига эга бўлиб, аниқ нишонни йўқ қилиш функцияси билан жиҳозланган. Уларда 10–40 кг атрофидаги портловчи моддалар жойлашган бўлади.
Дронларнинг кичик ўлчами ва 2 минг километргача учиш имконияти бор, аммо уларнинг юкори товушли двигатели сабабли «мопед» деб номланган. Бу ускуналар Россия томонидан кенг миқёсда ишлатилаётгани Украина учун катта хавф туғдирмоқда.
Зеленскийнинг сўзларига кўра, АҚШнинг ушбу қароридан сўнг Украинада «Шаҳид»ларга қарши курашиш имкониятлари сезиларли даражада чекланади. У халқаро ҳамкорлардан янада аниқ ва барқарор ёрдам кутаётганини билдирди.