Ўзбекистон қонунчилигига киритилган ўзгаришларга мувофиқ, 12 ёшга тўлмаган икки ва ундан ортиқ болалари ёки 16 ёшга тўлмаган ногиронлиги бўлган боласи мавжуд ота-она ёки ота-она ўрнини босувчи шахсларга қўшимча таътил берилмоқда.
Мазкур таътил камида тўрт календарь кундан иборат бўлиб, у ҳақ тўланадиган меҳнат таътили ҳисобланади. Ушбу таътил йиллик меҳнат таътилига қўшиб олиниши ёки иш берувчи билан келишилган ҳолда алоҳида тартибда (тўлиқ ёки қисмларга бўлиб) амалга оширилиши мумкин.
Шу билан бирга, таътилдан фақат тегишли иш йили давомида фойдаланишга рухсат берилади. Ушбу ҳуқуқни кейинги иш йилига кўчириш ёки уни пулли компенсация билан алмаштириш тақиқланган.
Меҳнат кодексидаги бу янгилик оилавий масъулиятларни қўллаб-қувватлаш ҳамда болали ота-оналар учун ижтимоий муҳофазани кучайтиришга қаратилган чоралардан биридир. Қонуннинг тўлиқ матни Lex.uz порталида эълон қилинган.