Депутатлар республиканинг атроф-муҳитни муҳофаза қилиш соҳасидаги саъй-ҳаракатларини эътироф этар экан, бир қатор муҳим муаммолар ҳал этилмай қолиб кетаётганини таъкидлашди. Жумладан, чиқиндиларни тўплаш ва қайта ишлаш учун мўлжалланган станциялар қурилиши кечикиб, ифлосланган ерлар ҳануз тикланмаган.
Қонун чиқарувчиларнинг фикрича, чиқиндиларни тоифаларга ажратиш учун махсус QR-кодли ўрамлар билан таъминлаш, қайта ишлаш технологияларини жорий этиш ва санитар тозалаш корхоналарининг техник жиҳозланиши борасида етарли ишлар қилинмаяпти. Шунингдек, иккинчи хомашёни қайта ишловчи тадбиркорлар учун «яшил субсидиялар» тизими ҳам ишлаб чиқилмаган.
Алоҳида эътибор талаб қилувчи масала сифатида депутатлар электромобил аккумуляторларини утилизация қилиш бўйича ечимлар мавжуд эмаслигини қайд этишди. Электротранспорт оммалашган сари бу муаммо янада долзарб тус олмоқда.
Парламент сўрови орқали вазирдан чиқиндиларни бошқариш тизимини модернизация қилиш, полигонларни ёпиш ва атроф-муҳитга хавф туғдирадиган объектларни бартараф этиш бўйича амалга оширилаётган ишлар юзасидан тўлиқ маълумот тақдим этиши сўралди.