Лондондаги Chatham House марказида сўзга чиққан Рютте, 24–25 июн кунлари Ҳаагада бўлиб ўтадиган саммит якунларида қабул қилиниши кутилган коммюникеда Украина масаласи ўз аксини топишини билдирди. Бироқ унга кўра, ҳозирча аъзолар Киевни НАТОга қабул қилиш вақти етиб келгани ҳақида ягона тўхтамга келгани йўқ.
Рютте Америка президенти Доналд Трампни Владимир Путин билан музокаралар олиб боришга ва уни урушни тўхтатишга чақирди. «У Путин билан бу даҳшатли урушни қандай якунлаш ҳақида гаплашишни бошлаши керак», — деди НАТО раҳбари.
Шунингдек, Рютте АҚШ президенти Трамп, Жо Байден маъмуриятидан фарқли равишда, урушни тугатиш бўйича НАТО иттифоқчилари билан ҳамкорликда ҳаракат қилаётганини қайд этди.
НАТО бош котибининг таъкидлашича, Россия Хитой, Шимолий Корея ва Эрон билан бирлашган ҳолда ўз ҳарбий салоҳиятини кенгайтирмоқда. «Путиннинг ҳарбий машиналари секинламаяпти, аксинча тезлашмоқда», — деди у.
Унинг сўзларига кўра, Москва уч ойда НАТО мамлакатлари бир йилда ишлаб чиқарадиган миқдорда қурол ясамоқда. 2025 йилда Россия 1500 та танк, 3000 та бронетехника ва 200 та «Искандер» ракетасини ишлаб чиқариши кутилмоқда.