Бу Ўзбекистон ва Болгария ўртасидаги сўнгги 17 йилдаги биринчи олий даражадаги учрашув бўлиб, давлатлар ўртасидаги шерикликни янги сифати даражага олиб чиқишга асос яратди, деб хабар бермоқда Президент матбуот хизмати.
Музокаралар давомида икки мамлакат ташқи сиёсат идоралари, парламентлари ва иқтисодий тузилмалари ўртасида ҳамкорликни янада фаоллаштиришга келишиб олинди. Айниқса, тўқимачилик, озиқ-овқат, кимё, фармацевтика, металл буюмлар ва технологик ускуналар савдосини кенгайтириш масаласига алоҳида эътибор қаратилди.
Икки мамлакат пойтахтларида савдо уйлари ташкил этиш, лабораторияларни аккредитациядан ўтказиш ва имтиёзли кредит линиялари очиш бўйича қарор қабул қилинди. Шунингдек, агросаноат, геология, сунъий интеллект, рақамли технологиялар ва туризм соҳаларида қўшма лойиҳаларни амалга ошириш бўйича келишувларга эришилди.
Томонлар тўғридан-тўғри авиақатновларни йўлга қўйиш имкониятларини кўриб чиқишга, шунингдек Софияда Ўзбекистон Миграция агентлигининг ваколатхонасини очиш масаласини муҳокама қилишга келишиб олдилар.
Ҳуманитар алоқалар доирасида олий таълим муассасалари ректорлари учрашуви ва Андижонда бўлиб ўтадиган академик алмашинув ҳамда кино ва маданият ҳафталиги ташкил этиш ташаббуслари қўллаб-қувватланди.
Музокаралар якунида икки президент ҳамкорликни кенгайтириш бўйича қўшма декларация имзолади. Шунингдек, Ташқи ишлар вазирликлари ўртасида 2026–2027 йилларга мўлжалланган дастур ва Тошкент–София шаҳарлари ўртасида шериклик тўғрисидаги битим қабул қилинди.