Axios нашрининг хабар беришича, Гринга хусусий секторда «рад этиб бўлмайдиган» таклиф тушган. У Конгрессни Трампнинг янги солиқ қонуни бўйича якуний овоз беришдан сўнг тарк этади.
«Мен аввалги Конгресс фаолияти тугагандан кейин кетишни режа қилган эдим, аммо президент Трампнинг чегара хавфсизлиги бўйича устувор ташаббусларини амалга ошириш учун қолдим», — деди у.
Грин аввалроқ кейинги сайловдга қатнашмаслигини айтган, бироқ кейин бу қарорини ўзгартирганди. Энди унинг кетиши Республика партияси учун сиёсий таваккалчиликни оширади.
Конгрессдаги республикачилар сони 219 нафарга тушади, демократлар эса 212 ўринга эга. Бу эса ҳар қандай партиявий қонун учун республикачиларга бор-йўғи учта овоз йўқотиш имкониятини қолдиради.
Теннесси штати қонунчилигига мувофиқ, губернатор Билл Ли истеъфо расман кучга киргандан сўнг 10 кун ичида навбатдан ташқари сайловларни эълон қилиши керак. Сайловлар эса 100–107 кун ичида бўлиб ўтади. Ҳудуд анъанавий равишда республикачи бўлгани боис, ўринни партия сақлаб қолиши кутилмоқда.
Гриннинг ўрнига ички хавфсизлик қўмитасига Майкл Маккол вақтинча раҳбар этиб тайинланиши режалаштирилмоқда. У 2026 йилгача қўмитага раҳбарлик қилиб, янги номзодларга сайлов кампанияси ўтказиш имконини беради.