Ивановнинг сўзларига кўра, интернет «оила асосларини емирувчи» янги турдаги қарамликка айланган. «Ёшлар мулоқот ва ота-оналик ҳақида ўйлаш ўрнига, тун бўйи телефонда ўтирар, ўйин ўйнаш ва сериал кўриш билан банд. Бу нафақат ёмон одат, балки мамлакатнинг демографик хавфсизлигига таҳдиддир», — деди у.
Депутат ҳукуматни ёшлар орасида реал мулоқотни рағбатлантирадиган шароитлар яратишга чақирди. Унинг таклифига кўра, аввалги босқичда интернетни тунлари ўчириш бўйича ихтиёрий эксперимент ташкил этилиб, провайдерлар ва ижтимоий хизматлар бу жараёнда иштирок этиши керак.
Шу билан бирга, Иванов Россияда кучли оилалар анъанасини тиклаш зарурлигини таъкидлаб, бунинг учун вақтлича интернетни чеклаш «миллат келажаги учун катта тўлов эмас», деди.
Мавзу Россия парламентида аввал ҳам кўтарилган. Сенатор Олга Епифанова ёшлар орасидаги интернетга бўлган муҳаббат «индивидуализм ва эгоизмни оширади» ва оилавий қадриятларга зарар етказишини айтган.
Россия туғилиш даражаси бўйича СССР парчаланганидан бери энг жиддий инқирозни бошдан кечирмоқда. Росстат маълумотларига кўра, 2024 йилда туғилганлар сони 1,222 млн кишини ташкил этди — бу 1999 йилдан бери энг паст кўрсаткич.
2025 йил январда туғилиш коэффициенти бир аёлга ўртача 1,399 боладан тўғри келган — бу сўнгги 18 йилдаги энг паст даража ҳисобланади. Президент Владимир Путин 2030 йилгача бу кўрсаткични 1,6 га етказиш учун ҳар бир оиладан 8–10 фарзанд кўришни сўраган, аммо аҳоли бунга тайёр эмас. Одамлар уруш, сиёсий беқарорлик, молиявий қийинчилик ва жамиятдаги руҳий тушкунликни асосий тўсиқ сифатида келтирадилар.