SpaceX компанияси 2025 йилда 15,5 млрд доллар миқдоридаги даромад ҳақида маълум қилди. Бу рақамни Илон Маск ижтимоий тармоқда шахсан эълон қилди. Унга кўра, компаниянинг асосий даромад манбалари — Falcon ракеталари орқали тижорат ва давлат буюртмалари асосида амалга оширилаётган учиришлар, ҳамда Starlink сунъий йўлдош интернет хизмати ҳисобланади.
Компаниянинг NASA билан шартномалари эвазига 1,1 млрд доллар миқдорида даромад келган. Novaspace маълумотларига кўра, 2024 йилда SpaceX 11,8 млрд доллар даромад олган бўлиб, 2025 йилдаги ўсиш яққол кўзга ташланади.
SpaceX ўзининг молиявий натижаларини жамоатчиликка камдан-кам ошкор этади. Шу боис, бу маълумотлар нафақат компаниянинг ўсиш суръатини, балки Маск бошчилигидаги космик стратегиянинг самарадорлигини ҳам кўрсатиб беради.
Компания дунёдаги энг йирик хусусий аэрокосмик тузилма бўлиб қолмоқда. Маск Starlink орқали глобал интернет қопламасини кенгайтиришни ва ракеталарни тижорат мақсадида кўпайтиришни давом эттирмоқда.
Молиявий ўсиш SpaceX’нинг космик соҳадаги етакчилик позициясини янада мустаҳкамлаб, компанияни келажакда янада катта мақсадлар сари етаклаши кутилмоқда.