Шу билан бирга, у 7 октябрда Исроилнинг жанубига қилинган ҳужумни илк бор очиқча танқид қилди.
Аббос ўз мактубида икки давлат — Исроил ва Фаластиннинг тинчликда яшашини назарда тутувчи концепцияни қайтадан илгари сурди. Унга кўра, халқаро ҳамжамиятнинг қўллаб-қуввати ва кафолати остида, аниқ муддатлар билан белгилаб қўйилган шартномага эришиш орқали Ғазодаги урушга барҳам бериш мумкин.
Ушбу мурожаат Франция президенти Макрон ва Саудия Арабистони валиаҳди Муҳаммад ибн Салмоннинг июн ойида Ню Йоркдаги БМТ қароргоҳида ўтказиладиган халқаро конференцияда ҳамраис сифатида иштирок этишидан олдин йўлланган. Аббос ўз мактубида тинчлик жараёнини қайта жонлантириш учун зарур бўлган чора-тадбирларни баён қилди.
Германиянинг DPA агентлиги маълум қилишича, Аббос ўз мурожаатида 2023 йил 7 октябрда ҲАМАС аъзолари томонидан амалга оширилган тинч аҳолига ҳужумни, асирлар олинишини очиқ танқид қилди ва бу ҳаракатларни ноқонуний ва қабул қилиб бўлмас, деб атаган.
The Times of Israel эса Аббоснинг мазкур баёноти ушбу ҳужумни биринчи марта расман қоралаши эканини таъкидлади. У ҲАМАСдан ўз қўлидаги асирларни озод қилишни яна бир бор талаб этди.
Франция президенти Эммануэл Макрон эса аввалроқ Фаластин давлатини тан олишга очиқ эканини билдирган, бироқ бу учун ҲАМАС қуролсизлантирилиши ва барча асирлар озод қилиниши шарт сифатида қўйилганини таъкидлаган эди.