Президент Мирзиёевнинг айтишича, «тўртинчи саноат инқилоби» дунёда технологик минералларга бўлган талабни бир неча баробар оширган. Ўзбекистон ҳудудида вольфрам, молибден, магний, литий, графит, ванадий ва титан каби кўплаб стратегик минераллар захиралари аниқланган. Мамлакат ер ости бойликларининг умумий потенциали 3 триллион долларга баҳоланмоқда.
Шу муносабат билан Тошкент ва Самарқанд вилоятларида «келажак металллари» технопарклари барпо этилмоқда. Давлат раҳбарининг таъкидлашича, ушбу ҳудудларни минераллардан юқори қўшимча қийматли маҳсулотлар ишлаб чиқариш марказига айлантириш мақсад қилинган.
Янги ташаббусга кўра, геологик қидирув ишларидан тортиб, тайёр маҳсулот ишлаб чиқаришгача бўлган тўлиқ ишлаб чиқариш занжирини амалга оширган инвесторларга 10 йил мобайнида рента солиғи қайтариб берилади. Президент ушбу чора орқали мамлакатга инвестиция оқимини кучайтириш, соҳадаги стратегик ҳамкорликни ривожлантиришни кўзлаётганини билдирди.
Унинг қайд этишича, бу орқали Ўзбекистон ҳамкорлар билан ўзаро манфаатли ва узоқ муддатли муносабатлар ўрнатиб, янги лойиҳаларга йўл очади. Шунингдек, сўнгги йилларда Ўзбекистон АҚШ ва Буюк Британия билан муҳим минераллар соҳасида келишувлар устида иш олиб бормоқда. Мамлакат шу пайтгача АҚШ билан критик минераллар бўйича меморандум имзолаган, Франция ва Малайзия компаниялари билан қўшма лойиҳалар юзасидан келишувга эришган.
Ўзбекистонда 2022 йил 1 январдан эътиборан рента солиғи жорий этилган эди. У қимматбаҳо ва рангли металлар, радиацион элементлар, углеводородлар ва бошқа минерал маҳсулотлар ишлаб чиқарувчи корхоналар учун мўлжалланган. Айрим компанияларга ушбу солиқдан имтиёзлар ҳам берилган эди. Энди эса барқарор ишлаб чиқариш лойиҳалари учун тўлов қайтарилиши кўзда тутилмоқда.