Навроцкий — тарихчи, музей ходими, собиқ футболчи ва боксчи. Унинг анъанавий сиёсий элитага кирмаганлиги, балки халқ орасидаги «ўз одами» сифатида қабул қилиниши унга сиёсий баландликка олиб чиқди. Унинг Гданскдаги оғир ҳаёт шароити, спорт орқали тарбия ва университетда таълим олиши ҳақидаги маълумотлар омма билан яқинликни мустаҳкамлаган.
У вақтида Полша Миллий хотира институтига раҳбарлик қилган. Ушбу лавозимда тарихий сиёсат ва миллий хавфсизлик масалаларида қатъий позицияси билан танилган. Ҳозирда Навроцкийнинг Россия ва Украинага нисбатан танқидий муносабати борлиги таъкидланмоқда. У ўз сиёсий нутқларида Полша суверенитети ва миллий қадриятларни биринчи ўринга қўяётганини алоҳида уқтирган.
Жисмоний қуввати ҳам сайлов кампаниясида муҳим рол ўйнади: Навроцкий омма олдида жисмоний машқ қилади, музлатгич кўтаради ва спортга бўлган қизиқишини намоён қилади. У ўз сўзлари ва ҳаракатлари билан «ҳақиқий инсон» образини ярата олди.
Карол Навроцкий расман 6 август куни президентлик қасамёдни қилади. Унинг сиёсатдаги биринчи қадамлари Полша ташқи сиёсатининг янги йўналишларини белгилаб бериши мумкин.