Трамп журналистлар билан суҳбатда Нетаняҳу билан телефон орқали мулоқоти ҳақида гапирди. Унинг сўзларига кўра, томонлар бир қатор масалаларни, жумладан, Америка етакчиси музокараларга ўтишни таклиф қилган Эрон мавзусини муҳокама қилган.
«Мен унга айтдим: сен Эрон билан музокара олиб боришинг керак. Шундай қилсак яхши бўлади. Бу, эҳтимол, бугун сенга таклиф қилишим мумкин бўлган энг яхши ғоядир. Тур ва музокараларни бошла,» деб айтган Трамп.
Унинг қайд этишича, АҚШ вайронагарчиликлар ва одамлар ўлимини истисно қиладиган келишув тузишга интилмоқда. «Мен буни эронликларга айтдим. Умид қиламанки, бу йўл иш беради, эҳтимол йўқлигини истисно қилмайман — тез орада билиб оламиз,» — дея қўшимча қилди президент.
Трампнинг маълум қилишича, пайшанба куни АҚШ Эрон билан алоқа ўрнатишни режалаштирган.
Трамп музокаралар ҳақида гапирар экан, Эрон ҳозирча АҚШ кўришни истаган позицияда эмаслигини таъкидлади.
Трамп 7 март куни Fox Business Network телеканалига берган интервьюсида Эрон етакчиси Оятуллоҳ Али Хоманаийга мактуб йўллаганини маълум қилди.
«Мен ёзган эдим: умид қиламанки, сиз музокараларга рози бўласиз, чунки агар ҳарбий аралашувга ўтилса — бу даҳшатли бўлади,» — деди у.
Бунга жавобан, 8 март куни сўзлаган нутқида Хоманаий АҚШ муаммоларни мулоқот орқали ҳал қилишга интилмаётганини, фақат ўз шартларини ўтказишга ва ҳукмронлик қилишга уринаётганини айтди. Унинг таъкидлашича, Эрон бундай ёндашувни қабул қилмайди.
Халқаро ОАВ Теҳрон Вашингтон билан БАА воситачилигида билвосита музокаралар ўтказиш имкониятини кўриб чиқаётгани ҳақида хабар берди.
Аввалроқ АҚШ ва Эрон ўртасида Уммон воситачилигида алоқалар ўрнатилгани ҳақида ҳам хабар берилганди.