Президент Володимир Зеленскийнинг маълум қилишича, алмашинув 18 ёшдан 25 ёшгача бўлган ҳарбийлар ўртасида бўлиб, биринчи навбатда оғир жароҳатланган ва касал ҳолдаги украин асирлар қайтарилди. Аниқ рақамлар эълон қилинмади.
Қайтарилганлар орасида 3 йилдан зиёд вақт аввал Мариупол учун кечган жанглар давомида асирга тушган аскарлар ҳам бор. Украина ҳарбий асирлар бўйича координацион штаби уларнинг кўпчилиги оғир жароҳатлангани, тана аъзоларини йўқотгани ёки кўриш қобилияти билан боғлиқ муаммолари борлигини маълум қилди.
Россия Мудофаа вазирлиги ҳам ўз аскарларининг иккинчи гуруҳи қайтарилганини тасдиқлади. Улар Беларус ҳудудига етказилиб, у ерда тиббий ва психологик ёрдам кўрсатилмоқда. Қайтарилганлар сони ошкор этилмади. Келгусида улар Россия ҳудудига юборилиб, тўлиқ реабилитациядан ўтишлари режалаштирилган.
Шунингдек, икки томон қурбон бўлган ҳарбийларнинг жасадларини алмашишга келишгани, бироқ бу жараённинг аниқ вақти ошкор қилинмагани маълум қилинди.
Истанбулда ўтказилган сўнгги икки музокара даврасида Украина ва Россия делегациялари ҳеч қандай катта келишувларга эриша олмади. Бироқ асирларни алмашиш ва ҳалок бўлганларни қайтариш бўйича умумий келишув амалга оширилди.