Европа Иттифоқининг Россия банклари ва энергетика компанияларига қарши санкцияларининг 18-пакети қабул қилиниши осон кечмайди. Чунки унинг қабул қилиниши учун барча 27 аъзо давлатнинг якдиллиги талаб этилади. Венгрия ва Словакия эса бу жараённи блоклаш билан таҳдид қилмоқда.
Словакия бош вазири Роберт Фицо Россиядан нефт, газ ва ядро ёқилғиси етказиб бериш тўлиқ тўхтаганда мамлакат юза тутадиган муаммолар ечимисиз қолса, санкцияларга рози бўлмаслигини билдирди. Венгрия бош вазири Виктор Орбан ҳам бир неча марта Россияга қарши энергетик чекловларга қаршилигини билдирган.
Янги санкциялар пакети фақат банкларгина эмас, балки Nord Stream қувурлари билан боғлиқ компанияларни ҳам қамраб олади. Шунингдек, Россия нефтидан қайта ишланган ёқилғиларнинг учинчи давлатлар орқали импорт қилинишига ҳам тақиқ жорий этиш кўзда тутилган.
Европа Комиссияси раҳбари Урсула фон дер Ляйен ушбу таклифларни 11 июн куни тақдим этди. У G7 саммитида нефть нархлари учун белгиланган 60 долларлик чегарани пасайтириш ташаббусини ҳам қўллаб-қувватлашини маълум қилди.
Польша, ЕИ Кенгаши раислигини юритиб келаётган мамлакат сифатида, 1 июлгача — Дания раисликни қабул қилиб олишидан олдин — санкциялар пакетини қабул қилишга умид қилмоқда. Шу боис иттифоқ мамлакатлари 27 июн куни бўлиб ўтадиган етакчилар учрашувидан олдин келишувга эришиши керак.
Брюсселда элчиларнинг ёпиқ учрашувида таклифлар жиддий қаршиликка учрамагани айтилди. Дипломатлар сўзларига кўра, Словакия ва Венгриянинг расмий баёнотларидан фарқли равишда, ёпиқ эшиклар ортидаги музокараларда у қадар қатъий қаршилик кўринмаган.
Комиссия 17 та санкция пакетини қабул қилгани ва ҳозирги ҳолатда ҳам битимга эришиш мумкинлигини таъкидламоқда. Шу билан бирга, Брюссель 2027 йилгача Россия газидан тўлиқ воз кечиш бўйича аниқ йўл харитасини тақдим этишга тайёрланмоқда.