Янги пакетда асосий таклифлардан бири — Россия нефти учун ўрнатилган нарх чегарасини баррел учун 60 доллардан 45 долларга тушириш. Бу лимит илк бор 2022 йил декабрида «Катта еттилик» томонидан жорий этилган эди. Брюсселга кўра, бундай чоралар Москва бюджетига янада кучли зарба бериш учун мўлжалланган.
Бундан ташқари, Европа комиссияси қуйидаги чекловларни ҳам таклиф қилмоқда: «Шимолий оқим» ва «Шимолий оқим–2» лойиҳаларини бутунлай тўхтатиш, Россиянинг 77 та «хуфиёна флот» кемасини санкциялар рўйхатига киритиш, Россия хомашёсидан олинган нефт маҳсулотларини импорт қилишни тақиқлаш ва яна 22 рус банкини SWIFT тизимидан узиш.
Европа комиссияси раҳбари Урсула фон дер Ляйен бу пакетни фақат иқтисодий эмас, балки сиёсий мақсадлар учун ҳам муҳим деб баҳолади. Унинг сўзларига кўра, бу санкциялар орқали Россияни камида 30 кунлик шартсиз ўт очишни тўхтатишга ундаш мумкин.
Шу билан бирга, Европа санкциялари тўлиқ кучга кириши учун барча 27 аъзо давлатнинг якдил розилиги талаб қилинади. Венгрия ва Словакия санкциялар сиёсатини танқид қилиб, бу чоралар Европа иқтисодига кўпроқ зарар келтираётганини билдиришган. Аммо, ҳозирча, улар янги пакетни тўлиқ тўсиш чорасига ўтмаган.
АҚШнинг мавжуд позицияси бу жараёнда муҳим омил бўлиб қолмоқда. Доналд Трамп янги санкциялар киритишдан бош тортган бўлса-да, унинг Россияга нисбатан риторикаси сўнгги ҳафталарда янада қатъийлашди. Аммо Европа дипломатлари АҚШсиз ҳам босимни кучайтириш кераклигини таъкидлашмоқда.
G7 доирасида Россия нефти учун янги нарх лимити масаласи келаси ҳафта Канадада ўтадиган саммитда муҳокама қилинади. Урсула фон дер Ляйен «бизнинг мақсадимиз — G7 сифатида ҳамжиҳатликда ҳаракат қилиш», деган баёнот билан чиқди.