АҚШ Давлат котиби Марко Рубио USAID – АҚШ Халқаро тараққиёт агентлигининг хориждаги барча ходимларини ишдан бўшатиш бўйича расмий кўрсатма берди. Бу ҳақда ABC News манбаси маълум қилди.
Рубионинг топшириғига кўра, АҚШнинг дунё бўйлаб фаолият юритаётган элчихоналари 30 сентябрга қадар агентликнинг қолган барча ходимларини ишдан бўшатиш жараёнини якунлаши керак. Шу орқали USAIDнинг ташқи ёрдам дастурлари Давлат департаменти зиммасига ўтади.
Айни пайтда, федерал судья президент Дональд Трампнинг оммавий ишдан бўшатиш ҳақидаги фармонини вақтинча тўхтатиб турди. Даъвогарлар фикрича, Рубионинг агентликни қайта ташкил этиш режаси ушбу суд қарорини инкор этишга тенг.
USAIDни тугатиш ва унинг 10 мингдан ортиқ ходим ва пудратчиларини ишдан бўшатиш Трамп маъмуриятининг ҳукумат тизимини оптималлаштириш йўлидаги энг кескин қадамларидан бири бўлмоқда. Бу жараён АҚШнинг халқаро ёрдам сиёсатида жиддий ўзгаришлар юз беришини англатиши мумкин.