12 июнь куни Ҳиндистоннинг Гужарат штати Аҳмадобод шаҳрида Air India авиакомпаниясининг Boeing 787 Dreamliner самолёти ҳалокатга учради. Самолёт Лондоннинг Гэтвик аэропортига учиш учун ҳавога кўтарилганидан сўнг қисқа вақт ичида қулаб тушган. Бу ҳақда India TV телеканали ва маҳаллий ОАВлар хабар бермоқда.
Бортда жами 242 нафар йўловчи бўлгани айтилмоқда. Ҳозирча ҳалок бўлганлар ва жароҳатланганлар ҳақида аниқ маълумот берилмаган. Воқеа жойидан тарқалган видеолавҳаларда аэропорт ҳудудидан кўтарилаётган қора тутун яққол кўриниб турибди. Айрим манбалар эса ҳалокатдан омон қолганлар ҳам борлигини айтишмоқда.
Air India расмий баёнотида, мазкур рейс AI171 «инцидентга учрагани» маълум қилинди ва қўшимча маълумотлар кейинроқ эълон қилинишини билдиришди. Ҳозирда қутқарув ва тергов ишлари олиб борилмоқда. Расмийлар самолёт саҳнида 242 киши, жумладан 2 нафар учувчи ва 10 нафар борт кузатувчилари бўлганини тасдиқлашди.
Бу ҳалокат АҚШнинг Boeing компанияси атрофидаги танқидлар ва техник муаммоларга тўла даврида содир бўлди. Илгари FAA — АҚШ Федерал авиация маъмурияти, айрим Boeing самолётларини текшириш учун вақтинча парвозлардан четлатган эди.
Шунингдек, Boeing компанияси 2018 ва 2019 йилларда содир бўлган MAX авиакатастрофаларидан сўнг АҚШ Адлия вазирлиги билан миллиард долларлик келишувга имзо чеккан. Ҳужжатда компания сифат назоратини лозим даражада таъминламагани қайд этилган.
Қайд этиб ўтиш керак, ушбу авиаҳалокат Boeing 787 Dreamliner самолётлари билан юз берган илк авиаҳалокат ҳисобланади.