Украина президенти Володимир Зеленский Россияни тинчликка мажбурлаш учун таъсирчан иқтисодий чоралар қўллаш зарурлигини таъкидлади. У бу ҳақда Global Security Forum доирасидаги чиқишида маълум қилди.
Зеленскийга кўра, Россияни урушдан қайтариш учун инсон йўқотишлари етарли эмас — чунки Кремл учун одам ҳаёти муҳим эмас. Москва нефт экспортидан келадиган даромад ва бюджет маблағларига боғланган.
«Агар Россия нефтни 30 доллардан қиммат бўлмаган нархда сотса, улар тинчлик ҳақида гапира бошлайди. Шунинг учун нефт санкциялари ва молиявий блоклашларни кучайтириш керак», — деди у.
Украина президентининг айтишича, Россия бюджетига пул келишига имкон берувчи барча йўллар беркитилиши зарур. Бундан ташқари, Россиянинг банк тизимига қаратилган санкциялар, халқаро майдондаги дипломатик яккалаш ва Украина ҳамкорлари билан қўшма мудофаа ҳаракатлари ҳам катта таъсир кўрсатади.
«Кремл учун асосий хавф — пулсизлик, дипломатик обрўйнинг йўқолиши ва Украина қаршилигининг сақланиши. Улар миллионлаб инсонларнинг ўлими учун асло қайғурмайди», — деди Зеленский. Унинг таъкидлашича, диктатура режимларидан келадиган хавф барча учун умумий таҳдид ҳисобланади.