OpenAI ўзининг энг ривожланган сунъий интеллект модели — ChatGPT о3-pro’ни ишга туширди. Бу модел мантиқий фикрлашга ихтисослаштирилган бўлиб, физика, математика, дастурлаш ва таҳлилий вазифаларда юқори самара кўрсатмоқда.
TechCrunchʼнинг хабар беришича, API орқали моделдан фойдаланиш нархи 1 млн кириш токени учун 20 доллар ва чиқиш токени учун 80 долларни ташкил этади. Тахминий ҳисобда, 1 млн токен 750 минг сўзга тенг.
OpenAI ички синовларида о3-pro олдинги версияларга нисбатан кучлироқ деб топилган. Айниқса фан, таълим, бизнес, дастурлаш ва матн тайёрлаш каби соҳаларда устунлиги қайд этилган. Модел ўзининг аниқ ва тўлиқ жавоблари, юқори даражада кўрсатмага риоя қилиши билан ажралиб туради.
Бундан ташқари, о3-pro интернетда қидириш, файл таҳлили, расмлар билан ишлаш, Python тилида кодлаш ва шахсийлаштирилган жавоблар тайёрлаш каби функцияларни қўллаб-қувватлайди. Аммо унинг жавоб тезлиги аввалги о1-pro моделидан секинроқ.
OpenAI маълумотларига кўра, AIME 2024 (математика синови) ва GPQA Diamond (PhD даражасидаги билимлар синови) натижаларида о3-pro рақобатдош моделлар — Google’нинг Gemini 2.5 Pro ва Anthropic’нинг Claude 4 Opus моделларидан устун чиққан.
Айни пайтда, ChatGPT’да вақтинчалик чатлар техник муаммолар туфайли ўчириб қўйилган. Шунингдек, о3-pro тасвир ярата олмайди ва OpenAI’нинг Canvas функциясини қўллаб-қувватламайди.
Ушбу янги модел ChatGPT Pro ва Team фойдаланувчилари учун аллақачон ишга туширилган. Enterprise ва Edu режаларидаги фойдаланувчилар эса келаси ҳафтада унга кириш имконига эга бўладилар. Шундай бўлса-да, о3-pro моделини API орқали ишлаб чиқувчилар ҳозирнинг ўзидаёқ қўллай олади.