Украина президенти Володимир Зеленский 11 июн куни «Украина – Жанубий-Шарқий Европа» саммитида сўзга чиқиб, Россия ҳужумларидаги стратегик мақсадлардан бири — Одесса шаҳрини йўқ қилиш эканини маълум қилди. Саммит Украина президентининг YouTube-саҳифасида жонли эфирда намойиш этилди.
«Бу шаҳар — Одесса — Россия учун нишон. Улар уни йўқ қилишни хоҳламоқда. Худди ишғол қилинган ҳудудлардаги саноқсиз шаҳар ва қишлоқлар каби», — деди Зеленский. Унга кўра, Россиянинг ҳарбий режалари Одессани босиб олиб, кейин Молдова ва Руминия чегарасигача боришни кўзда тутади.
Зеленский халқаро ҳамкорлардан реал кафолатлар ва узоқ муддатли муҳофаза механизмларини талаб қилди. Унинг таъкидлашича, Украинага ҳозир нафaқат ҳаво ҳужумларидан ҳимоя тизимлари, балки киберҳужумларга қарши муҳофаза ва тезкор чора кўриш имкониятлари ҳам зарур.
Президент Россиянинг агрессиясига қарши туриш учун фақат сўз эмас, амалий чоралар — жумладан, замонавий ҳарбий техникалар, НАТО стандартидаги мудофаа тизимлари ва жаҳон ҳамжамиятининг қатъий позицияси кераклигини таъкидлади.
Саммит доирасида Украина томони Европа Иттифоқи ва минтақавий иттифоқчилардан янада кенгроқ ҳарбий-сиёсий ҳамкорликни кутаётганини билдирди. Зеленскийнинг таъкидлашича, Одесса ва унинг порти бутун минтақанинг хавфсизлиги учун стратегик аҳамиятга эга.