Россиянинг «Росатом» давлат корпорацияси Ўзбекистонда икки турдаги атом электр станциясини қуриш лойиҳасини амалга оширади. Энди ҳам кичик, ҳам катта қувватли атом электр станцияларини қуриш режалаштирилмоқда. Бу ҳақда Россия Иқтисодий ривожланиш вазирлиги Тошкент халқаро инвестиция форуми доирасида ўтказилган Россия–Ўзбекистон товар айирбошлашини кенгайтириш бўйича ишчи гуруҳи йиғилиши якунлари бўйича маълум қилди, деб ёзмоқда Interfax.
Таъкидланишича, ўтган йили фақат кичик қувватли атом станцияси қурилиши кўзда тутилган эди. Аммо бу йил икки давлат раҳбарлари лойиҳани кенгайтиришга келишиб, ҳар бири икки блокдан иборат бўлган катта ва кичик АЭС қуришга қарор қилишган.
«Росатом» раҳбари Алексей Лихачёвнинг сўзларига кўра, компания 2026 йилга қадар, ёки ундан аввалроқ кичик АЭС қурилиши учун бетон қуйиш ишларини бошлашни режалаштирмоқда. Унинг кўра, корпорация катта қувватли станция учун ҳам лойиҳа, молиялаштириш схемаси ва маҳаллийлаштириш бўйича таклифларни тайёрлаган.
Кичик АЭС — «Росатом»нинг хориждаги биринчи экспорт лойиҳаси ҳисобланади. Бу ҳақдаги келишув 2023 йил баҳорида имзоланган ва кузда техник ҳужжатлар ишлаб чиқилиши режалаштирилган эди. Ушбу станция олтита 55 мегаваттли реактордан иборат бўлиб, қурилиш ишлари 2025 йил ёзида бошланиши, фойдаланишга топшириш эса 2029–2033 йилларга мўлжалланган.
Мазкур лойиҳа Ўзбекистон томонидан молиялаштирилади, Россия томонидан қарз ажратилиши масаласи муҳокама қилинмаган. Лойиҳа энергия етишмаслигини камайтириш ва энергетик мустақилликни таъминлашда муҳим қадам сифатида баҳоланмоқда.
Meta description: