АҚШ молия вазири Скотт Бессентнинг баёнотига кўра, Украина иқтисодиёти 20 йил ичида Россия иқтисодиётидан устун бўлиши мумкин. Бу ҳақда у АҚШ Конгрессидаги эшитувлар пайтида маълум қилган.
Унинг таъкидлашича, ҳар қандай мамлакатда иқтисодий барқарорлик миллий хавфсизликнинг асосидир. Президент Доналд Трамп ҳам бу фикрни қўллаб-қувватлайди. Улар Украина иқтисодиётининг узоқ муддатли барқарорлиги Россиянинг келажакдаги ҳужумларига қарши энг самарали чора бўлади, деб ҳисоблайди.
Бессент ўз нутқида Польша ва Украина мисолини келтирди. Берлин девори қулаганида икки давлатнинг иқтисодиёти деярли тенг бўлган. Аммо бугунга келиб Польша иқтисоди Украинадан уч баробар катта. Унга кўра, тўғри бошқарув, АҚШ билан ҳамкорлик ва халқаро сармоялар Украина иқтисодиётини Россиядан катта қилишга хизмат қилади.
Шунингдек, вазир Италия пойтахти Римда Украина тикланишига бағишланган йирик анжуман бўлиб ўтадигани ва бу масалада Жаҳон банки фаол иштирок этиши кераклигини билдирди.
Бессент қўшимча қилди: Россия ҳарбий ҳаракатларига пул, техника ёки жўнатмалар билан ёрдам берган бирорта мамлакат Украина тикланиш жараёнида иштирок этиш ҳуқуқига эга бўлмайди. Унинг таъкидлашича, «бир мамлакатни вайрон қилиб, кейин уни тиклашдан пул ишлаб бўлмайди».