Ҳиндистонда содир бўлган авиаҳалокат сабаблари бўйича суриштирув ҳали давом этмоқда ва мутахассислар бу воқеага айнан нима сабаб бўлганини айтиш учун ҳали жуда эрта, деб ҳисоблашмоқда.
Фавқулодда вазиятлар бўйича АҚШлик мутахассис, собиқ терговчи Жефф Гуззетти Associated Press агентлигига маълум қилишича, Air India авиакомпаниясининг Лондонга йўл олган 171-рейси Аҳмадабод аэропортидан кўтарилиш пайтида нега қийинчиликка дуч келгани ҳозирча тушунарсиз.
Ҳалокатдан олдинги видеоларда самолётда тутун ёки ёнғин аломатлари кўринмайди. Шунинг учун, Гуззеттининг таъкидлашича, бу ҳолатда қушлар билан тўқнашув эҳтимоли йўқ. Ҳатто бир двигатель ишдан чиққан тақдирда ҳам, иккинчи двигател самолётни ҳавога кўтара олиши керак бўлган.
Унинг сўзларига кўра, иккала двигател ҳам бир вақтнинг ўзида кучсизланиб, нормал ишлашни тўхтатган бўлиши мумкин. «Бундай ҳолат тахминан 15 йил олдин Ҳитроу аэропортига қўнаётган Boeing-777 самолёти билан ҳам содир бўлган эди. Ўшанда ҳар икки двигатель музлаб қолган ёқилғи сабабли ишдан чиққан. Бу сафар ҳам ёқилғи билан боғлиқ муаммо бўлиши мумкин», — деди у.
Гуззеттининг қўшимча қилишича, «одатда, ёқилғи таркибининг бузилиши каби муаммолар самолёт учаётган пайтда намоён бўлади».