Британия разведкаси маълумотларига кўра, Россия 2022 йилдаги Украинага тўлақонли босқиндан бери 1 миллионга яқин ҳарбийни йўқотган. Улар орасида 250 мингга яқини ҳалок бўлган. Бу Иккинчи жаҳон урушидан кейин Россия армияси учун энг йирик йўқотишлар сифатида қайд этилмоқда.
Мудофаа вазирлиги билдиришича, Россия армиясининг 400–500 минг ҳарбий хизматчиси батамом сафдан чиққан — ҳалок бўлган, бедарак йўқолган ёки оғир яралар туфайли жангга қайта олмайди. Айнан шу оғир яраланганлар оқими Россиянинг ҳарбий-тиббий тизимини оғир аҳволга солган: дала ҳоспиталларидан тортиб, ихтисослашган шифохоналаргача.
2025 йилнинг ўзида февралдан буён фақат Россия 200 мингдан зиёд йўқотишга учраган бўлиши мумкин. Украина Бош штаби маълумотларига кўра, Россия ҳар куни ўртача 1250 нафар аскарини йўқотмоқда.
Шу ҳолатда ҳам, Британиянинг баҳолашича, Москва ҳали ҳам кўп сонли пиёда аскарлар билан босим ўтказиш тактикасига амал қилмоқда. Кремл кўп сонли йўқотишларга кўникиб бўлган ва фақат жамоатчилик ёки элита қаршилиги ошгандагина стратегияни қайта кўриб чиқиши мумкин.
Аввалроқ АҚШ президенти Доналд Трамп ҳам Россия ҳар ҳафта 5 минггача аскарини йўқотаётганини айтган эди. Унинг фикрича, бу ҳолат Владимир Путинга таъсир қилмаяпти. «Эҳтимол, у бунга бефарқ», — деган Трамп ўз подкастида.
Журналистлар ҳам қурбонлар сони юзасидан таҳлиллар берди. «Медиазона» ва BBC 110 минг 608 нафар россиялик ҳалок бўлганини номма-ном аниқлаган. Аммо бу фақат умумий йўқотишларнинг 45–65 фоизини ташкил этади. Уларнинг ҳисоб-китобига кўра, реал қурбонлар сони 191–269 мингга етиши мумкин.
Вашингтондаги CSIS маркази ҳисобича, урушнинг умумий қурбонлари сони 1,4 миллион нафарга етган. Улардан тахминан 1 миллион нафари Россия ҳиссасига тўғри келади.