АҚШ Мудофаа вазири Пит Ҳегсет Украинадаги бир қанча ҳаводан ҳимоя тизимлари ва дронларга қарши қуролларни Яқин Шарққа кўчиришга қарор қилинганини маълум қилди. Унинг сўзларига кўра, бу қадам минтақадаги Америка ҳарбийлари хавфсизлигини таъминлаш мақсадида амалга оширилган. Ҳегсет Fox News телеканалига берган интервьюсида: «Менда Конгрессда тўғридан тўғри сўрашди — ростдан ҳам Украинадан дронларга қарши тизимларни олиб кетдингизми? Мен: «Ҳа, шундай қилдик», деб жавоб бердим», — деди.
Вазирнинг таъкидлашича, ҳозирги шароитда ҳатто кичик дронлар ҳам жиддий хавф солиши мумкин. Шу сабаб, АҚШ ҳарбийлари бутун дунёдаги кучларини қайта тақсимламоқда.
8 июн куни Украина президенти Володимир Зеленский АҚШ аввал Киевга ваъда қилган 20 мингта дронларга қарши ракета Яқин Шарққа юборилганини билдирганди. Бу тасдиқланган маълумотга айланганидан сўнг, украин жамоатчилигида Вашингтонга нисбатан норозилик кучайди.
Шунингдек, The Wall Street Journal нашри 5 июн куни ёзганидек, Пит Ҳегсетнинг шахсан кўрсатмасига асосан, Украинага юборилиши керак бўлган махсус ракета портлаткичлари ҳам Яқин Шарқдаги Америка манфаатлари йўлида йўналтирилган. Бу қарор Сенат қуролланиш ишлари бўйича қўмитасига ёпиқ тарзда юборилган ҳужжат орқали маълум қилинган.
Бундан ташқари, Axios манбаси 13 июн куни АҚШ ҳарбийлари Исроилга Эроннинг ракеталарини йўқ қилишда ёрдам бераётганини ёзди. Эртага эса Эроннинг Fars ахборот агентлиги Америка ҳарбий базаларига зарба бериш эҳтимоли ҳақида огоҳлантирди.
Исроил 13 июнга ўтар кечаси Эронга қарши кенг кўламли ҳарбий амалиёт бошлаган. Бош вазир Бинямин Нетаняҳу бу ҳаракат Теҳронни ядро қуроли яратишдан тўхтатишга қаратилганини айтган. Жавоб тариқасида Эрон «Чинакам ваъда-3» номли операцияни бошлаб, Исроилга ракеталар ва дронлар билан зарба берди.
Президент Доналд Трамп эса АҚШнинг ушбу амалиётга алоқаси йўқлигини маълум қилди.