Шанба куни Эрон парламенти депутати Исмоил Кавсари ушбу стратегик йўлакни ёпиш масаласи муҳокама этилаётганини айтди. Унинг сўзларидан сўнг айрим ОАВлар ва пропаганда каналлари нефть нархи 130 долларга чиқиши мумкинлигини башорат қилдилар. Бироқ бозорда бундай кескин реакция кузатилмади.
Маълумки, Ҳурмуз бўғози орқали жаҳон нефт экспортининг 40 фоизга яқини, шунингдек, кўрфаз давлатлари экспорт қилувчи нефт маҳсулотларининг 90 фоизга яқини ташилади. Эрон ушбу йўлакни жисмонан назорат қилиш имконига эга. Бироқ бу йўлак Эроннинг ўзи учун ҳам стратегик аҳамиятга эга экани сабабли, уни ёпиш оғир иқтисодий оқибатларга олиб келиши мумкин.
Мутахассислар фикрича, бўғознинг ёпилиши нафақат Эрон ва Исроил муносабатларини кескинлаштиради, балки глобал геосиёсий мувозанатни бузиб, бошқа кучли давлатларни можарога тортиши эҳтимоли ҳам юқори.
Шунга қарамай, душанба куни бозорлар очилиши билан Brent маркали нефт нархи 74 доллар атрофида барқарор турибди. Ҳолбуки, ўтган ҳафтанинг охирида нархлар қисқа муддатда 78 долларгача кўтарилган эди.