АҚШ президенти Доналд Трамп раҳбарлигидаги маъмурият 36 та давлат фуқаролари учун мамлакатга киришни тўлиқ ёки қисман тақиқлаш имкониятини муҳокама қилмоқда. Бу ҳақда Reuters агентлиги 15 июн куни АҚШ Давлат департаментининг ички дипломатик телеграммасига таянган ҳолда хабар берди. Телеграммада давлат котиби Марко Рубио имзоси мавжуд.
Ҳужжатда қайд этилишича, АҚШ хавотир билдираётган давлатлардан бири деб топилган мамлакатлар 60 кун ичида бу хавотирларни бартараф этмаса, уларнинг фуқароларига виза беришда чекловлар қўлланилиши мумкин. Хусусан, айрим давлатлар фуқароларининг АҚШда терроризм акти содир этишда қатнашгани ёки антисемитик ва антиамерикан фаолият билан шуғуллангани қайд этилган.
Бошқа давлатлар эса ўз фуқароларини АҚШдан чиқариб юборишга ёрдам бермагани, ёки шахсни тасдиқловчи ишончли ҳужжатлар билан таъминлай олмаслиги боис танқид остига олинган. Шунингдек, айрим давлатлар томонидан бериладиган паспортлар Вашингтон томонидан хавфсиз эмас, деб топилган.
Рўйхатга киритилган давлатлар орасида Ангола, Антигуа ва Барбуда, Гана, Конго Демократик Республикаси, Камерун, Миср, Сурия, Қирғизистон, Эфиопия ва яна кўплаб Африка ва Осиё мамлакатлари бор. Ўзбекистон рўйхатда келтирилмаган.
Тақиқлар қўлланилиши эҳтимолига қараб, бу мамлакатлардан келувчи фуқаролар икки ойдан сўнг АҚШга кириш ҳуқуқидан маҳрум бўлиши мумкин.