2025 йил 16 июн куни Олий Мажлис Қонунчилик палатасида бўлиб ўтган йиғилишда Йўл ҳаракати қоидаларига оид енгил ҳуқуқбузарликлар учун маъмурий огоҳлантириш бериш тартибини назарда тутувчи қонун лойиҳаси муҳокама қилинди. Бу ҳақда ЎзЛиДеП фракцияси матбуот хизмати хабар берди.
Қонун лойиҳаси Маъмурий жавобгарлик тўғрисидаги кодексга ўзгартириш киритишни назарда тутади. Унга кўра, биринчи марта енгил қоидабузарлик содир этган ҳайдовчига жарима ёки балл тизимига ўтмасдан, фақат огоҳлантириш билан чекланиш имкони пайдо бўлади. Лойиҳа ҳуқуқни муҳофаза қилиш жараёнида инсофли ва тушунтиришга йўналтирилган ёндашувни шакллантиришни мақсад қилади.
Муҳокама пайтида депутатлар ушбу ташаббусни ўз вақтидаги ва адолатли чора сифатида баҳолади. Уларга кўра, қонунбузарликнинг оғирлиги ва шахснинг аввалги интизоми инобатга олиниши ҳуқуқий адолатни таъминлайди ва жамиятда ҳуқуқий маданиятни оширади.
Лойиҳада шунингдек, Кодекснинг 36-моддасига ўзгартириш киритиш, яъни маъмурий жазо ҳақида фуқароларга ўз вақтида ва аниқ маълумот етказиш, автоматик фото ва видеофиксация орқали аниқланган қоидабузарликлар учун масъулиятни белгилаш механизмларини такомиллаштириш кўзда тутилган.
Қайд этилишича, огоҳлантириш бериш амалиёти 2024 йил май ойида Вазирлар Маҳкамаси қабул қилган қарор асосида қонунчилик ташаббуслари таркибига киритилган. Яъни, бу тартиб йилда бир маротаба, бир ҳайдовчига нисбатан қўлланилиши мумкин бўлади.