Германия сиёсий доирасида Исроилнинг Эрон ҳудудидаги сўнгги операциялари бўйича кескин фикрлар билдирилмоқда. Немис канцлери Фридрих Мерц ARD телеканалига берган интервьюсида Исроил томонидан амалга оширилган ҳаракатларни “ифлос иш” деб атади, бироқ бу ҳаракатни қўллаб-қувватлашини аниқ баён этди.
«Ҳа, бу Исроилнинг у ерда бажарган ифлос иши. Мен фақатгина Исроил армияси ва раҳбариятининг буни қилишга журъат этганига нисбатан чуқур ҳурматимни изҳор этишим мумкин», – деди Мерц журналист билан суҳбатда.
Мерц шунингдек, Эронда амалга оширилган зарбалар мамлакат ичидаги ҳокимият тузилмасини ўзгартиришга олиб келиши мумкинлигини билдирди.
«Биз ҳозир ички ва ташқи террорга асосланган режим билан муносабатдамиз. Бу тузумга барҳам берилса, яхши бўларди», – деди у интервью давомида.
Мерцнинг ушбу баёноти Исроилнинг Эрондаги ҳарбий ҳаракатлари бўйича Ғарб давлатларининг позицияси янада аниқлашиб бораётганидан далолат бермоқда.