Сунъий интеллект (СИ) — рақамли технология сифатида қабул қилинса-да, унинг ҳар бир натижаси ортида улкан энергия сарфи, серверлар ва нодир ерости элементлари турибди. OpenAI бош директори Сэм Алтманнинг таъкидлашича, «СИ келажагининг нархи — бу энергия нархи».
Америка Қўшма Штатлари ўз СИ инфратузилмасини таъминлаш учун қўшимча 90 GW энергия қувватига муҳтож бўлади. Бу тахминан 90 та атом электростанцияси қувватига тенг. Мамлакатлар ўртасидаги рақобатда арзон ва тоза энергияга эга давлатлар ғолиб бўлиши айтилаяпти.
Бундан ташқари, катта СИ-компаниялар ўзлари ишлаб чиқараётган углерод чиқиндилари ҳақида ҳисобот бермаётгани ҳам танқид қилинмоқда. Масалан, OpenAI’нинг тасвир генератори фаолият бошлаганидан сўнг, фақат бир ҳафтада 700 миллиондан ортиқ расм яратилди. Бу жараён 5 млн kWh энергия талаб қилган — бу АҚШдаги 24 минг хонадоннинг ҳафталик сарфидан ҳам ортиқ.
TIME таҳлилида қайд этилишича, СИ технологиялари барқарор ривожланиши учун АҚШ углерод изи бўйича мажбурий ҳисобот тизимини жорий этиши, энергетика сиёсатида СИ тармоғини инобатга олиши ва экологияга таъсирни баҳолашни ҳуқуқий жиҳатдан расмийлаштириши лозим.
Массачусетс штатининг «СИнинг атроф-муҳитга таъсири тўғрисидаги қонун» (Artificial Intelligence Environmental Impacts Act) лойиҳаси айнан шу мақсадда ишлаб чиқилмоқда. Сенатор Тед Бадд буни шундай ифода этган: «Биз Хитой устидан ғалаба қозонамизми-йўқми, бу энергияга боғлиқ».