Ўзбекистон Ташқи ишлар вазирлиги Исроилда бўлиб турган фуқаролар учун хавфсизлик нуқтаи назаридан чиқиб кетиш имкониятлари ҳақида расмий маълумот эълон қилди. Таъкидланишича, Ўзбекистон фуқаролари Исроилни мустақил равишда тарк этишлари мумкин бўлган назорат-ўтказиш пунктлари тўлиқ фаолият кўрсатмоқда.
Миср орқали чиқиш учун «Менахем Бегин» «Таба» (Эйлат – Таба) пунктидан фойдаланиш мумкин. Бу ерда Ўзбекистон фуқаролари «Синай кириш муҳри» орқали визасиз 14 кунлик рухсат олишлари мумкин. Аммо ушбу муҳр фақат Синай ярим оролида бўлиш ҳуқуқини беради. Шарм аш-Шайх аэропорти орқали Тошкентга «UzAirways» ҳафтасига 3 марта, шунингдек, «Turkish Airlines» ва «Pegasus Airlines» орқали Истанбул транзити билан учиш мумкин.
Иордания орқали чиқиш имкони «Шайх Хусайн» ва «Ицхак Рабин» «Вади Арава» чегараларидан бор. Бу ердан Иордания пойтахти Амманга етиб бориб, «Амман – Истанбул – Тошкент» ёки «Амман – Дубай – Тошкент» йўналишларидан фойдаланиш мумкин. Иорданияга кириш учун онлайн виза олиш талаб этилади (https://moi.gov.jo).
Ўзбекистон элчихоналари фуқароларни зарур ҳолларда алоқада бўлиб туришга ва хавфсизлик қоидаларига қатъий риоя қилишга чақирмоқда. Исроил, Миср ва Иордания бўйича махсус фавқулодда телефон рақамлари ва электрон манзиллар ҳам тақдим этилган.
Шунингдек, 21 ёшга тўлмаган фуқароларни фақат ота-онасидан бири ҳамроҳлигидаги ҳолда чегарадан ўтишга рухсат этилиши белгиланган. Ушбу маълумотлар фуқаролар хавфсиз ва тизимли чиқиши учун амалий кўмак сифатида тайёрланган.