Эрон полицияси Исроил фойдасига жосуслик қилган ва «мамлакатнинг обрўсига путур етказишга» уринган 24 кишини қамоққа олди. Бу ҳақда AFP Эроннинг Tasnim агентлигига асосланиб хабар бермоқда.
Ғарбий Теҳрон полиция бошлиғи Киумарс Азизийнинг таъкидлашича, қамоққа олинганлар ҳақиқий ҳаётда ҳам, интернетда ҳам Исроил фойдасига жосуслик фаолияти билан шуғулланган.
16 июн куни Эроннинг Мизан агентлиги Исроил разведкаси «Моссад»нинг гумонланган жосуси қатл этилгани ҳақида маълум қилди. Нашр хабарига кўра, Исмоил Фекри ўтган қишда жосусликда гумон қилиниб ушланган. Тергов маълумотларига қараганда, у Исроил махсус хизматининг икки вакили билан алоқада бўлган ва мукофот эвазига уларга «махфий маълумотлар»ни етказиб берган.