Magnum компанияси Ўзбекистонга декабр 2021 йилда кириб келган. Илк гипермаркет 5 минг метр квадрат майдонда очилган, кейинчалик бешта супермаркет фаолияти йўлга қўйилган. Ўша вақтда компания раҳбари Азамат Осмонов 20 миллион долларлик инвестиция режаси ҳақида гапирган.
2023 йил август ойида «Magnum Carrefour» тармоғига қарашли «Majid Al Futtaim LLC Uzbekistan» компаниясини сотиб олган ва унга тегишли олтита савдо нуқтасини ўз бренди остида қайта очишни режалаштирган. 2023 йил ноябрига келиб, тармоқ Тошкентда еттита дўконга эга бўлган ва 2024 йилда яна ўнта филиал очишни режалаштирган.
«Magnum Cash&Carry» Қозоғистонда 2007 йилдан бери фаолият юритади ва мамлакатнинг 14 шаҳрида 200 дан ортиқ савдо нуқтасига эга. Компаниянинг соҳадаги 2024 йилги даромади 480 млрд тенгени ташкил этиб, Forbes Kazakhstan рейтингининг саккизинчи ўрнини эгаллаган.
Компания Kaspi.kz билан ҳамкорликда E-Magnum рақамли лойиҳасини ривожлантирган. 2023 йилда Kaspi мазкур лойиҳага 70 млрд тенге сармоя киритиб, ундаги улушини 90,01 фоизга етказган. Шу билан бирга, «Magnum Cash&Carry» тармоғи мазкур лойиҳада 9,99 фоизлик миноритар улушга эга бўлиб қолган.
«Magnum»нинг Ўзбекистондан чиқиш сабаблари расман очиқланмаган бўлса-да, бу қарор тармоқнинг маҳаллий бозордаги рақобат ва иқтисодий шароитларга мослашишидаги мураккабликлар билан боғлиқ бўлиши мумкин.