Туркия марказий банки 19 июн кунги мажлисида асосий қайта молиялаш ставкасини 46 фоиз даражасида сақлаб қолди. Шунингдек, овэрнайт кредитлар учун ставка 49 фоиз, депозитлар учун эса 44,5 фоиз этиб қолдирилди. Бу ҳақда регулятор расмий сайтида маълум қилди.
Банк баёнотида айтилишича, инфляция борасида июн ойида маълум бир пасайиш кутилмоқда. Бироқ инфляцион кутилмалар ва бозордаги нархлар шаклланиши дезинфляция жараёнига хавф солмоқда. Шу муносабат билан Марказий банк эҳтиёткорлик билан қарор қабул қилиши ва геосиёсий вазият ҳамда халқаро савдо тизимидаги протекционист сиёсатларни кузатиши кераклиги таъкидланди.
Туркия иқтисодиётида базавий инфляцияни пасайтириш ва ўрта муддатли мақсад — 5 фоизлик инфляция даражасига эришиш учун зарур пул-кредит шароитлари яратиш режалаштирилмоқда. Мазкур мақсадлар инфляцияни барқарор пастга қаратиш учун муҳим босқич саналади.
Апрел ойида Туркия Марказий банки ставкада кутилмаган оширишга бориб, уни 42,5 фоиздан 46 фоизга кўтарганди. Бу қарор лиранинг қатор минимал даражаларга тушиб кетиши ва Истанбул мэри Акром Имомўғлининг қўлга олиниши фонида қабул қилинган. Март ойида доллар курсининг лирага нисбатан 12 фоизга кўтарилиб, тарихда илк бор 1 доллар 41 лирадан ошгани ҳам банкни қўшимча интервенцияларга мажбур қилганди.
Шунингдек, ўтган декабрдан бошлаб банк уч марта ставка пасайтиришни амалга оширган эди. 2024 йил декабрида 50 фоиздан 47,5 фоизга, 2025 йил январь ва март ойларида эса мос равишда 45 фоиз ва 42,5 фоизгача туширилган. Аммо ҳозирги босқичда инфляциянинг юқори даражаси фонида 46 фоизда тўхтаб туриш мақсадга мувофиқ, деб баҳоланмоқда.
Кейинги йиғилиш 24 июл куни бўлиб ўтади ва унда фоиз сиёсатининг яна қандай йўналиш олиши мумкинлиги кўриб чиқилади.