Россия ҳукумати Украина томонидан юборилаётган дронлар хавфини чеклаш мақсадида электрон уруш технологияларидан кенг фойдаланмоқда. Аммо бу ҳимоя чоралари мамлакат авиация тизимида турли муаммоларни келтириб чиқармоқда. Учувчилар оммавий равишда тўқнашувларга қарши автоматик огоҳлантириш тизимлари ишдан чиқиб, учиш хавфли бўлиб бораётганини маълум қилмоқда.
Айниқса, бу ҳолат Санкт-Петербург шаҳрида жиддий кўриниш олган. Президент Владимир Путин иштирокида ўтадиган халқаро иқтисодий форум арафасида хавфсизлик чоралари кескин кучайтирилган. Минглаб маҳаллий ва хорижий меҳмонлар қатнашадиган тадбир муносабати билан ҳаво ҳудудида GPS тўсиш каби техника воситалари жорий қилинган.
Сўнгги олти кун ичида Пулково аэропортига келаётган ва учаётган учувчилар томонидан 160 дан зиёд расмий шикоят келиб тушган.
Хабарларга кўра, Путиннинг иштирокини талаб қилувчи тадбирларда ҳимоя блокировкалари янада кучайтирилади. Бу эса ҳавода аниқлаш мумкин бўлмаган «номаълум объектлар»ни пайдо қилиш орқали учувчиларнинг навигациясига халақит бераётгани қайд этилган. Оқибатда, экипаж аъзолари шошилинч равишда йўналиш ёки баландликни ўзгартиришга мажбур бўлаётгани таъкидланмоқда.