Беларус президенти Александр Лукашенко мамлакатдаги энг машҳур мухолифатчилардан бири — Сергей Тихановскийни қамоқдан озод этишга фармон берди. Бу ҳақда маҳаллий «Наша Ніва» нашри хабар берди. Маълумотларга кўра, озодликка чиққан Тихановский Беларус ҳудудини тарк этган, аммо бу борада бошқа тафсилотлар ошкор қилинмаган.
Сергей Тихановский — «Страна для жизни» номли YouTube-канали асосчиси ва сиёсий блогер сифатида танилган. У ўз чиқишларида Беларус ҳукуматини очиқ танқид қилиб келган. 2020 йилда Тихановский президентлик сайловларида номзод бўлиб қатнашиш ниятини билдирган, аммо 29 май куни сайловолди пикетлардан бири пайтида куч ишлатувчи органлар томонидан қўлга олинган.
Лукашенко кейинроқ оммавий чиқишида Тихановскийни шахсан ўз буйруғи билан ҳибсга олдирганини маълум қилган ва уни Беларусда «Майдан» уюштиришга уринишда айблаган. 2021 йил декабрида Тихановскийга оммавий тартибсизликлар уюштириш, ижтимоий адоват қўзғатиш ва сайлов комиссияси фаолиятига тўсқинлик қилиш моддалари билан 18 йиллик қамоқ жазоси тайинланган эди. Кейинроқ унинг жазоси яна 1,5 йилга узайтирилган. У ўз айбини умуман тан олмаган.
Беларус манбаларига кўра, Сергей Тихановский бирга журналист Игорь Корней, Минск давлат лингвистика университетининг собиқ ўқитувчиси Наталья Дулина, анархистик ҳаракат фаоли Акихиро Гаевский-Ханада, ҳамда Галина Краснянская ва Кирилл Балахонов ҳам озод этилди. Жами 14 нафар сиёсий маҳбус озод қилингани маълум.
«Президент Трампнинг қатъий раҳбарлиги туфайли, бугун Беларусдан 14 нафар маҳбус озод этилди. Ҳамкорлик ва кўрсатган ёрдами учун Литва ҳукуматига миннатдорчилик билдирамиз — улар ҳақиқий дўст ва иттифоқдош бўлиб қолмоқда», — деб ёзди Twitter’да Кейт Келлогнинг махсус вакили ўринбосари Жон Коул.