Reuters агентлигининг хабар беришича, Женевада Эрон ташқи ишлар вазири Аббос Ароқчий ҳамда Буюк Британия, Франция, Германия ва ЕИ ташқи сиёсат раҳбарлари ўртасидаги музокаралар кутилган натижани бермади. Учинчи томонлар, жумладан, Франция вазири Жан-Ноэл Барро, Эроннинг музокараларга қизиқиш билдирганини қайд этди. У АҚШни ҳам жараёнга жалб этиш тарафдори эканини айтди.
Буюк Британия ташқи ишлар вазири Дэвид Лэмми эса Эрон Вашингтон билан мулоқотни қайта тиклаши лозимлигини таъкидлади. Европа томони Эрон ядровий қуролга эга бўлиши мумкин эмаслигини Теҳронга очиқ билдирган.
Ароқчий музокараларни шу форматда давом эттиришга тайёрлигини айтди. AFP маълумотига кўра, у Теҳрон фақат тажовуз тўхтатилганидан сўнг дипломатик жараёнга қайта киришини билдирган.
АҚШ президенти Доналд Трамп музокараларга муносабат билдириб, АҚШ Теҳрон билан ўз канали орқали алоқада эканини айтди. Унга кўра, Эрон Европа билан ҳамкорлик қилишни хоҳламайди. «Европа бу масалада ёрдам бера олмайди», — деган Трамп.
Франция президенти Эммануэл Макрон музокаралар олдидан Эронга уранни бойитишдан воз кечиш, ракета дастурини чеклаш ва террорчи гуруҳларни қўллаб-қувватлашни тўхтатишни таклиф қилгани маълум қилинган эди.
Айни пайтда Исроил 13 июндан буён Эроннинг ядровий инфратузилмасига қарши йирик ҳарбий операция олиб бормоқда. Ҳар икки томон ўртасида юзлаб ракета ва дронлар иштирокида кескин тўқнашувлар давом этмоқда.
Bloomberg хабарига кўра, АҚШ Эронга тўғридан тўғри зарба бериш имкониятини муҳокама қилмоқда. The Wall Street Journal эса Трамп ҳарбий операция режасини маъқуллаганини, аммо уни амалга оширишни кечиктираётганини ёзмоқда. The Guardian эса АҚШ президенти ҳали қарор қабул қилмаганини, чунки GBU-57 бомбаси Фўрдудаги мустаҳкам ядровий иншоотни йўқ қилишга қодир эмаслигидан шубҳаланишини маълум қилган.
Оқ уй расмий баёнотида айтилганидек, АҚШнинг эҳтимолий ҳарбий аралашувга оид якуний қарори «икки ҳафта ичида» қабул қилинади.