АҚШ Эрон ядровий инфратузилмасига зарба берди. Доналд Трамп шанба куни Фўрду, Натанз ва Исфаҳон ядровий объектларига қилинган ҳаво ҳужумларини шахсан тасдиқлади. Унга кўра, бу иншоотлар «тўлиқ ва бутунлай йўқ қилинган».
Бир неча соат ўтиб, Оқ уйда қилган баёнотида Трамп Эронни янада катта фожеалар билан огоҳлантирди. «Эрон икки йўл остонасида турибди: ё тинчлик, ё охирги саккиз кунда кўрилгандан ҳам оғирроқ фожиа», — деди у.
У АҚШнинг ҳужумларини «аниқ, тезкор ва моҳирона» деб таърифлади ва агар тинчлик бўлмаса, яна кўплаб нишонлар борлигини билдирди. АҚШ ҳарбийлари биринчи марта GBU-57 туридаги «бункербузар» бомбалардан фойдаланганини маълум қилди. Ушбу бомба Фўрду ядровий марказида қўлланилган.
Шу билан бирга, АҚШ денгиз кучлари ҳам амалиётда қатнашди — тахминан 30 та «Томаҳавк» қанотли ракета учирилди. Бу ҳужумлар Исроил билан келишилган ҳолда амалга оширилди. Трамп бош вазир Бинямин Нетаняҳу билан «жамоавий иш олиб борилганини» ва бу ҳамкорлик «беназир» бўлганини айтди.
Нетаняху ўз мурожаатида Трампни Исроил тарихидаги энг яқин дўст деб атади. «У менга қўнғироқ қилди — бу самимий ва ҳиссиётли суҳбат бўлди», — деди у ва бутун яҳудий халқи номидан раҳмат билдирди.
Икки томондан қилинган ҳужумлар ортидан Эрон ташқи ишлар вазири Аббос Ароқчий жавоб қайтарилишини эълон қилди. Унинг сўзларига кўра, Теҳрон «барча имкониятларни ўзида сақлаб қолади».
Ислом жумҳуриятининг БМТдаги элчиси Хавфсизлик кенгашининг фавқулодда йиғилишини талаб қилди. У АҚШнинг ҳаракатларини «ҳуқуқсиз ва жирканч ҳужумлар» деб атади.
Вашингтонда жойлашган инсон ҳуқуқлари ташкилоти маълумотларига кўра, Исроил зарбалари натижасида камида 865 нафар эронлик ҳалок бўлган, 3396 нафар киши яраланган. Улар орасида 363 нафар фуқаро ва 215 нафар хавфсизлик хизматлари ходимлари бор.