Apple компанияси рамкасиз дизайнга эга бўлган iPhone устида иш олиб бормоқда ва бу янги авлод смартфонларини 2027 йилда тақдим этиши мумкин. Бу ҳақда MacRumors манбаси хабар берди.
Bloomberg нашри журналисти Марк Гурманга кўра, янги iPhone моделларида Dynamic Island элементининг ўлчами қисқариб, экранда ҳеч қандай кесик ёки бўшлиқ қолмаслиги кутилмоқда. Компания iPhone’нинг 20 йиллик юбилейи муносабати билан бутунлай янгиланган моделни тақдим этишни режалаштирмоқда.
Юбилей версиясида егри шиша қирралар, жуда ингичка рамкалар ва узлуксиз экран дизайни бўлади. Бу Apple тарихидаги биринчи ҳақиқий рамкасиз ва шиша корпусли iPhone бўлиши мумкин.
Аввалроқ The Information нашри iPhone 18 Pro моделларида экран остига жойлаштирилган FaceID технологияси қўлланилиши ва фақат олд камера учун бир тешик қолиши ҳақида хабар берган эди. Бироқ Гурманга кўра, Apple ушбу режаларни 2027 йилда Dynamic Island ни қисқартириш орқали бошқача йўналишда давом эттирмоқда.
Apple тарихидаги муҳим юбилейларда янги технологияларни тақдим этиш анъанаси бор. Масалан, 2017 йилда iPhone’нинг 10 йиллиги муносабати билан FaceID ва «қош»га эга бўлган iPhone X тақдим этилган эди. Apple бу сафар ҳам бутунлай янги дизайн орқали жамоатчиликни ҳайратга солишни мақсад қилмоқда.
Bloomberg маълумотига кўра, янги смартфон тўлиқ шиша корпусга эга бўлади. Бундай ғояни бир неча йил аввал Apple’нинг собиқ бош дизайнери Жонатан Айв ҳам илгари сурган эди. У компания учун шиша асосида яратилган, бир бутун смартфон лойиҳаси орзуси бўлган.
Мутахассисларнинг таъкидлашича, бундай модел айрим фойдаланувчиларда эҳтиётсизлик ҳиссини уйғотиши мумкин, чунки қурилма жуда нозик бўлади. Шу билан бирга, Apple эстетика ва ўз дизайнерлик ғояларидан воз кечмаслиги айтилмоқда.